पुणे, दि. २3 ऑक्टोबर : पुणे शहरात डेंग्यूच्या वाढत्या प्रादुर्भावामुळे नागरिकांच्या आरोग्याचा प्रश्न गंभीर बनला आहे. शहरात डेंग्यूचे दोन हजारांहून अधिक रुग्ण आढळल्याचा दावा करण्यात येत असून, डासांचा प्रादुर्भाव रोखण्यासाठी महापालिका प्रशासनाने तातडीने ठोस उपाययोजना कराव्यात, अशी मागणी काँग्रेसकडून करण्यात आली आहे. पुढील ४८ तासांत प्रभावी कार्यवाही सुरू न झाल्यास महापालिका भवनासमोर आंदोलन करण्याचा इशाराही देण्यात आला आहे.
स्वच्छता आणि फवारणी वाढविण्याची मागणी
शहरातील विविध भागांमध्ये साचलेले पाणी, कचऱ्याचे ढीग आणि तुंबलेल्या गटारांमुळे डासांची पैदास वाढत असल्याचा आरोप करण्यात आला आहे. डेंग्यूचा प्रसार रोखण्यासाठी केवळ आश्वासने न देता प्रत्यक्ष कामातून नागरिकांना दिलासा द्यावा, अशी मागणी करण्यात आली आहे.
प्रत्येक प्रभागात विशेष स्वच्छता मोहीम राबवावी, साचलेले पाणी हटवावे, नियमित धूरफवारणी व डासनाशक औषधांची फवारणी करावी, तसेच केलेल्या कामाचा अहवाल नागरिकांसाठी उपलब्ध करून द्यावा, अशा मागण्या करण्यात आल्या आहेत.
रुग्णालयांमध्ये उपचार सुविधा उपलब्ध करण्याची मागणी
डेंग्यूच्या रुग्णांना वेळेवर निदान आणि उपचार मिळावेत, यासाठी महापालिका रुग्णालयांमध्ये आवश्यक तपासणी सुविधा उपलब्ध करून देण्याची मागणी करण्यात आली आहे. एनएस-१ चाचणी, प्लेटलेट्स तपासणी आणि आवश्यक उपचारांची व्यवस्था अधिक सक्षम करण्यावर भर देण्यात आला आहे.
४८ तासांचा अल्टिमेटम
डेंग्यूचा वाढता धोका लक्षात घेऊन महापालिका प्रशासनाने तातडीने प्रभावी उपाययोजना कराव्यात. स्वच्छता, फवारणी आणि आरोग्य सुविधांमध्ये सुधारणा करण्यासाठी प्रशासनाने पुढाकार घ्यावा. निर्धारित वेळेत ठोस कार्यवाही सुरू न झाल्यास महापालिका भवनासमोर आंदोलन करण्यात येईल, असा इशारा काँग्रेसकडून देण्यात आला आहे.
डेंग्यूचा प्रसार रोखण्यासाठी महापालिका प्रशासनाबरोबरच नागरिकांनीही आपल्या परिसरात पाणी साचू न देणे आणि स्वच्छता राखणे आवश्यक आहे.
