मुळशीच्या सभापती मंदाताई शेळके यांच्या हस्ते देवीची प्राणप्रतिष्ठापना; नवरात्रोत्सवातून सामाजिक परिवर्तनाचा संदेश
मुळशी,११ ऑक्टोबर: धार्मिक उत्सवाच्या माध्यमातून सामाजिक बांधिलकी जपत हिंजवडी गावठाण नवरात्र उत्सव मंडळाने यंदाही विधवा महिलांना पहिल्या आरतीचा मान दिला. सलग पाचव्या वर्षी ही परंपरा जपत मंडळाने विधवा महिलांच्या सन्मानाचा आणि सामाजिक समतेचा संदेश दिला. मुळशी तालुका पंचायत समितीच्या सभापती मंदाताई शेळके यांच्या हस्ते देवीची प्राणप्रतिष्ठापना व स्थापना करण्यात आली. यावेळी विधवा महिलांच्या हस्ते पहिली आरती करण्यात आली.
हिंजवडी गावठाण येथे नवरात्रोत्सवाला भक्तिमय वातावरणात सुरुवात झाली असून, यंदाही मंडळाच्या वतीने विविध धार्मिक, सांस्कृतिक आणि सामाजिक कार्यक्रमांचे आयोजन करण्यात आले आहे. देवीच्या प्रतिष्ठापनेनंतर विधवा महिलांना पहिल्या आरतीचा मान देऊन त्यांचा सन्मान करण्यात आला. या उपक्रमातून समाजातील महिलांविषयी असलेल्या जुन्या रूढी-परंपरांना सकारात्मक बदलाची जोड देण्याचा प्रयत्न मंडळाने केला आहे.
पतीचे निधन झाल्यानंतर अनेक महिलांना आजही सामाजिक आणि धार्मिक कार्यक्रमांमध्ये दुय्यम वागणूक मिळत असल्याचे चित्र काही ठिकाणी दिसते. ही मानसिकता बदलण्यासाठी हिंजवडी गावठाण नवरात्र उत्सव मंडळाने २०२२ पासून विधवा महिलांना पहिल्या आरतीचा मान देण्याचा उपक्रम सुरू केला. पाच वर्षांपासून ही परंपरा कायम ठेवत मंडळाने महिलांच्या सन्मानाला प्राधान्य दिले आहे.
नवरात्रोत्सव हा स्त्रीशक्तीच्या उपासनेचा सण आहे. त्यामुळे देवीची पूजा करताना समाजातील प्रत्येक महिलेचा सन्मान राखला जावा, या विचारातून मंडळाचा हा उपक्रम राबविण्यात येत आहे. धार्मिक परंपरेसोबतच सामाजिक जाणीव आणि संवेदनशीलता जपणाऱ्या या उपक्रमाचे परिसरातून कौतुक होत आहे.
हिंजवडीच्या मा. उपसरपंच दीपालीताई शरद जांभुळकर म्हणाल्या, ‘एखाद्या महिलेच्या पतीचे निधन झाले म्हणून त्या महिलेचा सन्मान कमी होत नाही. विधवा महिलांनाही समाजात इतर महिलांप्रमाणेच सन्मानाने जगण्याचा आणि प्रत्येक धार्मिक-सामाजिक कार्यक्रमात सहभागी होण्याचा अधिकार आहे. नवरात्रोत्सव हा स्त्रीशक्तीचा जागर करणारा सण असून, या उत्सवातून महिलांच्या सन्मानाचा विचार समाजापर्यंत पोहोचला पाहिजे. मंडळाने सलग पाच वर्षे ही परंपरा जपली, ही अभिमानाची बाब आहे. अशा उपक्रमांतून जुन्या रूढींमध्ये सकारात्मक बदल घडून समाजात समानता आणि माणुसकीची भावना अधिक दृढ होईल.’
धार्मिक उत्सवाला सामाजिक प्रबोधनाची जोड देणारा हिंजवडी गावठाण नवरात्र उत्सव मंडळाचा हा उपक्रम परिसरात सकारात्मक संदेश देणारा ठरत आहे. यंदाच्या नवरात्रोत्सवातही विविध कार्यक्रमांच्या माध्यमातून भक्ती, सामाजिक एकोपा आणि महिला सन्मानाचा जागर करण्यात येणार आहे.
